Der dressierte Mensch

Isch sitz` vor moi`m Sesam, moi`m Personalcomputer,

geb oi moi`n Code, hoffendlich dud er!

Denn wonn isch drei mol falsch codiere,

dud er, moin Sesam, efach ned reagiere.

Donn bin isch nämlich garnet drin, im EDV-Geschehe

Un schunn bin isch nervös, denn es will efach ned gehe

Ohne PC do bischt gonz schä uffgeschmisse,

do konnscht net schaffe und bischde noch so gerisse.

do brauchscht dein Administrator,

der öffnet dir donn des Tor,

zu deinem Peronalcomputer,

Freude durchzuckt dich! Jetzt dud er.

Allee de erschde Akt reicht jedoch ned,

für jede Aktion en Code es gebd!

Denn der Geheimnisse viele,

sinn des Spiones Ziele,

um ihm dies zu erschwere

oder gar zu verwehre,

gibt`s für jedes Programm im System,

en eigene Code und isch es dir ach ned genehm,

du muscht alle Schlüssel kenne,

sunscht muscht jedesmol zum Administrator renne.

Ob Lotus Notes, AKIT oder Internet,

ohne Schlüssel geht es net.

Zum Ofong hab isch schun beschriwwe,

wie des isch wonns falsch, ob hiwwe oder driwwe.

Willscht du emol verschicke e mail,

guck jo, dass du die richtig Adress gewähl,

denn wonn des net beachtescht,

du donn nur de Fehlerhinweis betrachtescht,

dein Empfänger jedoch nix bekam,

noch net e mol Fehlalarm.

Des verschteh ich unnerm dressierte Mensch,

denn doin Computer, ach wenn du glabscht den kennscht,

will nur akkurate Zahle un Buchschtabe,

schunnscht, des derfscht ma glawe,

hört dein Sesam ned uff dich,

hör uff zu bete, mach dich nicht lächerlich.

Konntest du in frühere postalische Zeite,

e Adress unvollkomme uff des Kuvert schreiwe,

kam der Brief ganz sicher beim Empfänger an,

weil en denkende Mensch äußerst filigran,

un mit sehr viel Fondasie un allerlei Finesse,

erarbeitete die richtige Adresse.

Isch konn mich noch gut do dro erinnern

wie vor zisch Johrzent im Sachgebiet, dem innern,

kam en Brief aussem Umland uff de Disch mit Akte,

als Adress nur „El fau a“ un ke weitere Fakte,

Stell der des mol vor als Adress in Lotus Notes,

do isch Feierowend, do sicht nur noch rotes.

Drumm nemm des gonze net so tragisch,

denk an dein Hund, der mag disch,

der hert dir gonz genau uffs Wort,

wonn du des rischdische sachscht, schunnscht isch er fort.

Speyer, 9. Mai 2007

Redaktionell ergänzt im Juli 2014